蘇媽.蘇媽馬來西亞茶餐室

營業中

休息中

今日約咗朋友去旺角玩board game快快手喺朗豪坊附近的蘇媽食個快 晚餐。之前幾次食蘇媽都係喺深水埗。旺角分店嘅面積大好多亦都有更多馬來西亞地道特色嘅裝飾。我哋四個人嗌咗六樣嘢，樣樣都抵食夾大件.食馬來西亞嘢一定唔少得肉骨茶啦。蘇媽最出名嘅就係佢嘅肉骨茶，而且最重要係肉骨茶湯任添 無錯係任添呀。湯底好甜係用好濃嘅豬骨加埋藥材熬成嘅。我哋今次揀咗一字骨，想試吓佢啲軟骨嘅味道。鍾意食肉嘅我真係啱晒。另一道我每次去到都會嗌嘅就係砂鍋老鼠粉。老鼠粉食落有啲似銀針粉，而係老鼠粉上面分別有肉碎香蒜乾蝦等等嘅配料，加埋啱啱好熟嘅窩蛋成個配合簡直係Perfect，一打開個煲蓋濃烈嘅香味就撲鼻而來啦。另外我哋又食咗雞絲河粉，味道比較淡啲，配合返其他濃味嘅嘢食比較合適。串燒嘅水準都OK但係相比老鼠粉同肉骨茶，就冇咁特別出色。食完主食，另一個甜品嘅胃就出嚟啦。食馬來西亞嘢就梗係要食埋呢個椰香咖吔多士啦。椰子香味好濃多士十分脆口，係一個極度邪惡但又令人把持不住嘅選擇。我哋用咗45分鐘左右就食晒枱面嘅嘢啦。總括而言蘇媽嘅嘢食堅抵食，坐嘅位置都舒服但係要長坐就未必太合適。