影片
更多
2014-07-13
4676 瀏覽
第三次黎食，巧合嘅係，無論係兩個定四個人，我地坐極都係最近廚房嘅個一張枱，唔知係咪近廚得食呢？ 是日係杭州張生記杭州菜嘅最後一日，我地梗係唔會放過啦。叫左八珍燴魚圓，杭州鹵鴨，同個炆小牛肉拼玫瑰山藥榚。八珍燴魚圓 $268(杭州菜)----話說同一個餐牌重有一個$88蚊嘅清湯魚圓，樓面介紹分別係八珍係多左8珍（我知好抽象），一時好奇，再加上八珍燴魚圓有圖（砂鍋上，面頭有幾片金華火腿），就叫左八珍燴魚圓。係第一個到嘅菜，男友同我父母都不期然嘩左一聲。唔係因為太靚，而係因為太清（睇相就知）。數黎數去都冇八珍不特止，原本係金華火腿嘅位置重變左做臘腸! 跟住叫個經理埋黎問，話清湯同八珍其實冇咩分別，就係多左個幾片野?佢竟然答係! 連湯底都係同一個，只係八珍將個湯整左做玻璃芡。咁佢憑咩買貴幾倍呀！八珍!咩叫八珍! 簡直係令人憤怒嘅開頭，因為同上兩次嘅質素實在相差太遠啦... 桂花糯米釀蓮藕 $88-98 (杭州菜)---- 功夫菜，買少見少。好食，唔膩，蓮藕鬆化，糯米軟糯，桂花香甜。有古早味，值得一吃奶皇流沙包 $50-60----包軟香，一拎上手已經感覺到中心有大量嘅空間，裝住滿滿嘅奶皇
是日係杭州張生記杭州菜嘅最後一日，我地梗係唔會放過啦。叫左八珍燴魚圓，杭州鹵鴨，同個炆小牛肉拼玫瑰山藥榚。
八珍燴魚圓 $268(杭州菜)----話說同一個餐牌重有一個$88蚊嘅清湯魚圓，樓面介紹分別係八珍係多左8珍（我知好抽象），一時好奇，再加上八珍燴魚圓有圖（砂鍋上，面頭有幾片金華火腿），就叫左八珍燴魚圓。係第一個到嘅菜，男友同我父母都不期然嘩左一聲。唔係因為太靚，而係因為太清（睇相就知）。數黎數去都冇八珍不特止，原本係金華火腿嘅位置重變左做臘腸! 跟住叫個經理埋黎問，話清湯同八珍其實冇咩分別，就係多左個幾片野?佢竟然答係! 連湯底都係同一個，只係八珍將個湯整左做玻璃芡。咁佢憑咩買貴幾倍呀！八珍!咩叫八珍! 簡直係令人憤怒嘅開頭，因為同上兩次嘅質素實在相差太遠啦...
桂花糯米釀蓮藕 $88-98 (杭州菜)---- 功夫菜，買少見少。好食，唔膩，蓮藕鬆化，糯米軟糯，桂花香甜。有古早味，值得一吃
奶皇流沙包 $50-60----包軟香，一拎上手已經感覺到中心有大量嘅空間，裝住滿滿嘅奶皇。一咬開，嘩!不得了! 啲奶皇流到要漏出黎咁制!奶皇重吉士味，重有一小粒嘅咸蛋黃，落足料令整個味道更上一層樓，絕對係重點推介。冇圖，因為太好食，醒起要影相經已太遲...
蛋白杏仁茶 $60----係近年我食過最香杏仁味同蛋白最滑嫩的。香濃白嫩嘅杏仁奶香，加上口感滑嫩嘅蛋白，真係食完一碗已經覺得好養顏!以呢個甜品黎做結尾真係完美!
炆小牛肉拼山藥玫瑰糕 $148(杭州菜)----熱情嘅經理話係用安格斯牛黎炆，所以牛味特別香濃，入味得黎又夠冧，真係值得一讚呀! 玫瑰山藥糕味道清淡，但糕粉味太重，玫瑰味又欠奉，所以唔太推薦。可惜牛肉冇得單叫，一定要拼個玫瑰山藥糕。
杭州鹵鴨 $98 (杭州菜)---- 勁正!入味香濃，重有軟骨，最難得係雖有肥膏但一啲都唔膩!
其他野食請睇下面圖文~
順道介紹埋之前食過嘅點心:
黑松露帶子餃 $60----香黑松露味，成隻餃包住肥滿嘅帶子，真係好滿足!
炸芋角 $50----香、鬆、脆，顯示出老師傅嘅功架，呢個老牌點心好食唔難，但要好食得黎唔油呂膩先至係真功夫!
金獎白雪龍皇炒麵 $298----同外面嘅龍蝦伊面唔同，帝苑軒用嘅係生面。原本以為會整成好似兩面黃咁嘅炸面，但見到實物先知道原來唔係。實物賣相真係好靚，生面爽口彈牙冇鹼水味，龍蝦鮮甜，食得出嘅新鮮。
總結3次經驗，服務真係好好，環境都又靚，雖然價錢貴左啲，但係勝在質素夠穩定，而且會不定期推出唔同嘅主題菜黎保持新鮮感，所以仍然會繼續支持。
題外話/補充資料：
提提各位，帝苑軒茶市比較忙，可以先訂位以減少等候時間。而根據經理本人親述，帝苑軒同對面東來順嘅菜原來係可以混叫，各位有興趣可能一次過食哂兩間馳名中菜。另外，由於人多事忙會影響食物質素、服務質素同加大漏單可能，各位可以響2點後先入座。
(以上食評乃用戶個人意見 , 並不代表OpenRice之觀點。)
張貼
