No Milkshake No Life (山道) (已結業)

間鋪空間唔大，如果你坐入去食都隱約聞到浸油煙味。當日叫咗一杯招牌皇者焦糖花生醬真脆煙肉奶昔、全日早餐同牛肉三文治(唔記得咗佢全名😅)。杯花生醬奶昔好多料，一入口一陣又香又滑嘅花生醬味，仲有啲炸到好脆嘅煙肉碎，好邪惡，不過佢哋嘅飲管好容易爛，後尾要轉返膠飲管，同埋如果你仲有叫其他嘢食我建議唔好一開始飲太多奶昔因為真係會飽；跟住嚟嘅三文治，呢件三文治上層已經有啲焦香嘅芝士，然後有好多汁同醬，中間嘅麵包都已經吸晒啲汁，其實我食唔到係啲乜嘢汁，因為所有嘢已經混埋一齊，一片片嘅牛肉好爽嫩，成個三文治係要用刀叉食，因為已經比D汁同芝士淹沒。跟住嚟嘅係全日早餐，Sourdough 麵包非常香脆，仲有少少甜味（唔知係咪加咗啲糖漿），兩隻太陽蛋，茄汁豆，煙肉有啲乾硬，仲有一隻厚肉嘅菇。總括嚟講，如果你嗰日心情好差，又或者想食啲嘢獎勵吓自己，好想食啲濃味熱氣仔嘢，我都推介你食呢間野。