龍皇酒家 (Mikiki) (已結業)

由於今日係表姐細仔百日宴嘅大日子，所以大姨媽就揀咗喺新蒲崗Mikiki商場嘅「龍皇酒家」擺百日宴！喺預訂嘅時候店員向大姨媽推介咗呢個今期做緊$2888超優惠嘅「龍皇」乳豬龍蝦海參宴，睇落好似幾抵食，所以我們就揀咗呢個套餐！燙手妙齡豬燒得外皮好香脆，肉質好鬆化軟滑，而且肥瘦均勻，無乜太多嘅脂肪，所以唔會有好油膩嘅感覺！紅燒花膠海參翅嘅濃稠度調教得恰到好處，唔會過稠或過稀，而且材料嘅份量都幾足料！蔥油加拿大龍蝦烏冬嘅肉質都幾爽甜彈牙，烏冬嘅質感亦好煙韌彈牙，芡汁再加埋香蔥，令到味道更加惹味！大龍躉兩食：翠玉炒球嘅肉質好結實彈牙，每件都幾大件厚身，啖啖肉咁，真係幾正！神草蒸頭腩蒸得啱啱好，所以肉質相當鮮甜嫩滑！避風塘軟殼蟹雖然好夠鑊氣同埋都幾惹味，但美中不足嘅係份量就比較少！豉油皇脆皮鷄嘅皮燒得都幾卜卜脆，肉質亦幾鬆軟嫩滑！鮮百合野菌泡時蔬有多款雜菌、清甜嘅百合同爽脆嘅時蔬，所以浸泡著嘅湯底味道相當清甜！五穀豐登係用欖菜嚟炒飯，但油嘅份量比較多，而且炒得唔算好乾身，所以感覺比較油膩！精美甜品係椰汁桂花糕，但椰汁嘅味道過度香甜濃郁，掩蓋晒桂花糕嘅味道，所以完全食唔到桂花糕嘅清香味！