西貢越南湯河

營業中

休息中

話說今日要去上堂自己一個去搵嘢食，原本見到大坑有間30蚊嘅煎肉餅蛋飯好想試，點知閂咗門。好啦咁行去第二檔嘢試吓牛腩麵，點知又閂咗門。再行去耐住食茶記，點知又係逢星期一休息！經過呢間餐廳，喺外面聞到幾香咁，諗住入去試吓，點知中伏！一坐低女店員俾咗杯水嚟，疑似幾好服務咁。叫咗個豬至尊湯檬$75，有豬手、豬腩、貢丸、扎肉、白蘿蔔、芽菜等配料。話說本人原本叫只係個湯檬，店員問我飲乜，我原本想話唔使要，仲問：「乜有嘢飲架咩？」佢馬上話：「係呀！跟餐有嘢飲。」仲指一指套餐餐牌。我以為係送，聽到佢一輪嘴話有「綠茶、奶茶、咖啡」，我自己又衰，無睇清楚餐牌就話綠茶。佢又問凍定熱，咁我又話要凍。食到一半我先發現，佢所謂嘅「套餐」係同單點唔同價，貴3蚊，而所謂嘅「套餐」就係多杯嘢飲。而且仲要凍飲加3蚊，然後我仲見到要加一服務費。老實講，咁嘅貨色咁嘅裝修格局，我一心以為自己去咗間魚蛋粉檔/茶記，無諗過要加一。都算，但係杯綠茶，根本就係超市買嗰啲好甜嘅樽裝綠茶加冰。$6.6唔係貴，超市買都要，但唔鍾意嘅係佢點解講到好似杯嘢係跟餐送咁。好，講返個湯檬，料係足嘅，材料本身個味道都唔錯，青檸俾兩瓣，比起其他舖係多嘅。