台南皇麵線 (已結業)

去台北的話，我一定去食麵線羮，而且仲係晚晚食。貪佢飽肚得嚟又易消化，第一次去台北食麵線羮，係幫襯“阿宗”，事隔多年仍念念不忘。坊間好多所謂嘅台灣料理，好多時都中伏。即使係正宗台灣人主理，佢哋嘅麵線羮都唔係自己想“尋回嘅味道”，直至响葵涌廣場搵到佢！皇麵線冇兼賣其他小食只賣麵線羮，但你可以加大腸，花枝丸，蚵仔，肉羮…… 可能因為專注嘅關係，當你第一啖食嘅時候，腦海中就會發出“叮”一聲！係佢喇！係多年前嘅味道！湯底甜中帶鹹加微辣，係有鮮味嘅湯頭。麵線非常幼滑，加上勾芡，造就如此美味嘅麵線羮！想加餸的話，大腸係最強烈推介！大腸洗得好乾淨冇雜味。用鹵水鹵煮入味，但仍然保留爽口彈牙。相比開店初期，大腸份量明顯多咗好多，相對抵食咗！蚵仔係細細粒，花枝丸係碎上，其他配料幾一般般。價錢方面由$23~$36 不等，响葵涌廣場嚟講屬中位數。大碗比細碗多一半，抵食好多。要食就預咗等，一般等5~10分鐘，但個人覺得如果店員專注啲快手啲，唔好停晒手唔知等乜咁，其實可以更好。