翡翠潮州小廚 (已結業)

放工突然想食潮州嘢，就揀咗佢。食物無論味道同份量都幾好，坐得又幾舒服，就寫寫佢啦。叫咗個套餐，有海鮮蠔仔粥同至尊滷水鵝拼盤。另外仲叫咗兩杯餐飲，分別係百香果黑糖冰茶同埋紫薯豆漿冰茶。講咗我杯嘢飲先，原來百香果同黑糖都幾夾，入先會係一陣百香果嘅香味，但個after taste 係有淡淡既黑糖味。$26一杯同你出邊飲珍珠奶茶差唔多，但依杯比較有特色。拼盤都幾震撼，因為真係包羅萬有，有鵝片，鵝肝，鵝腎，鵝腸同豆腐。味道仲要唔錯，雖然滷水味唔會特別重，但用了新鮮。鵝肝入口好潤滑，唔會過熟。鵝腎有咬口，唔會韌口。兩個人食的話，會食得好滿足。至於個海鮮蠔仔粥，平時蠔仔會係主角，但其他海鮮有啲喧賓奪主嘅感覺，唔係貶意，只係其他海鮮比蠔仔更出色。有蝦有魷魚有帆立貝。特別係個蝦，蝦腸已挑，蝦肉非常彈，幻想唔到個蝦肉擺咗落去煲粥，都仲有咁嘅咬口，所以我覺得應該係分開處理。但分開又好，唔分開又好，味道唔錯就得啦。總結：價錢雖然唔係唔算平民化，但食物飲品來講，係有質素嘅，再食多幾次都冇問題。