塩玉居酒屋 (已結業)

早排放工同男朋友2個人嚟咗銅鑼灣食晚飯，其實見網上都有唔少好評所以就嚟食下。夜晚8點幾上到嚟，環境唔算好大，有啲暗，但係都坐滿人，好彩我哋有book位！叫咗幾樣嘢食，首先係蔥吞拿魚腩薄脆。薄脆係米通嚟，面頭就係蔥吞拿魚腩，味道有少少鹽味，幾好食，配上下面嘅脆脆口感幾豐富！之後就有飛機壽司拼盤，每件都唔同，特別想講下個海膽壽司，好鮮甜，我男朋友就好鍾意鰻魚蟹子個款。至於黑松露白身魚薄切，一碟有8件，切得好通透，黑松露放喺另一個碟仔到，想食幾多黑松露就自己落！不過個人認為配黑松露有啲蓋過刺身嘅鮮味。再嚟黑松露甜蝦卷，呢款係我最鍾意食嘅，甜蝦真係好甜，仲有啲沙律醬同蟹柳，甜上加甜，配埋上面嘅吞拿魚蓉，我自己就好鍾意。最後有2款燒物，燒和牛，燒得好香，嚟到仲係熱辣辣，入口即溶，仲有好多肉汁，好好食！旁邊有小小柚子汁，不過我哋就無落！另外鵝肝釀雞翼，其實唔係好食得出鵝肝，只係覺得啖啖肉，同埋入面嘅汁係咬嘅時候標晒出嚟，好邪惡！整體黎講，食物幾出色，可以再嚟！