Starry Night (已結業)

琴日同屋企人一行7人諗住試新嘢，食生蠔放題，點知食到一肚氣，上菜又慢，經理態度又差，我哋上到去見一個客都冇已經覺得好奇怪，開頭我以為係我哋太早，但到我哋走嘅時候，都冇客囉，原來我哋中咗中大伏。我哋訂咗6:30 ，我細佬同佢朋友早20分鐘上去先，一上到去已經叫定兩打生蠔，點知等咗半個鐘先到，跟住我哋再叫四打生蠔，等咗十分鐘，經理入來話唔可以咁樣叫，只可以食完一打先可以再叫一打，都算數，佢個螺臭，有啲生蠔都係臭，兩打有一打都係吐返來，都未試過遇到一間咁嘅餐廳。個經理仲串到爆，我同屋企人講一陣再去食過，個經理就以為我話而家去第度食，即刻好串話咁我幫你地埋單。最後我哋忍唔住埋單走人，我哋訂6:30，7:00已經要埋單走人，埋張單都要搞咗我哋半個鐘，但重要錯，我哋七個人去食，張單收咗我哋八個人錢，好在發現到。呢間嘢我唔會再去，啲生蠔又唔新鮮，又唔凍，費事食到肚痾，冇下次😡😡