Steak Bar (已結業)

登龍街出晒名美食多, 就連呢間原本喺蘭桂坊嘅Steak Bar 都搬埋過嚟, 新鋪比舊鋪寬敞得多, 座位編排都鬆動啲, 就算滿座都唔會感覺迫挾。之前試過幾款牛都非常出色, 今日就試下羊架啦。呢個套餐除左主角 - 羊架之外, 仲有埋沙律、凍豆腐同白飯, 夠曬豐富呀！羊架表面完全煎封, 帶點焦香, 一切開, 內裏粉嫩多汁, 肉質柔軟。羊肉同羊脂比例恰如其分, 羊脂喺口腔溶化, 同時散發出嘅迷人嘅羊羶味。怕羶嘅朋友只要將油脂切走, 就可以大大減低羶味, 但我最愛嘅正正就係嗰層油脂, 羶羶地嘅羊先夠惹味。三五知己傾計聚舊, 又點可以無小食呢。呢度嘅小食選擇多, 而且質素之高, 絕對令你喜出望外！食過呢個炸魷魚, 你就會知道咩係真正嘅外酥內嫩, 薄薄嘅炸皮, 酥脆得嚟唔會太乾, 包著極為爽嫩嘅魷魚, 將鮮味封存。更難得係佢調味不重, 亦無多餘油份, 簡直係好食到不能自拔。炸餃子外皮薄脆, 餡料混合打碎咗嘅雞軟骨, 食落咬到大量Q彈有嚼勁嘅小顆粒, 口感獨特, 呢一餐實在令人回味樂無窮。