顏府御膳 (已結業)

前排忙到甩轆，連出街食餐飯嘅時間都冇，趁最近有返少少時間，即刻約朋友出去聚一聚！自從之前去過一次顏府御膳之後就比餐廳嘅環境同食物吸引咗，所以決定再去食多次～餐廳環境寬敞舒適，中菜擺盤精緻，味道都不錯。🥒青瓜海蜇頭作為前菜第一道餸，食落十分開胃。呢道餸除咗有海蜇同埋青瓜，仲有雲耳，所有食材都好爽脆！🍆塩燒茄子呢個係前菜第二道餸，份量好多。廚師將茄子切成長方條狀，令呢碟茄子嘅擺盤望落更加精緻。茄子外脆內軟，出面仲有少少椒鹽調味，無論係口感同味道都好正，係我最鍾意嘅一道餸。🥣保健老火湯當日飲嘅係冬瓜清補涼湯。我平時都好鍾意飲屋企嘅老火湯，今次喺餐廳飲嘅同平時飲開嘅好似，味道鮮甜，啱曬我口味！🥩鳳梨咕嚕肉伴炸雲吞呢個咕嚕肉好特別，平時食嗰啲配菜淨係得菠蘿，估唔到今次呢個咕嚕肉加埋士多啤梨落去煮！加咗士多啤梨嘅咕嚕肉，食落較酸同有淡淡果香，依然有甜味。🐔荷香蟲草花雲耳蒸雞蒸雞好大份，食完之後超飽！蟲草、雲耳、香菇連埋荷葉一齊蒸真係好香，而且雞肉超滑嫩，火候啱啱好，食完十分滿足！