勝八居酒屋 (已結業)

世界各地咁多國家嘅菜，試過咁多個，最鍾意嘅離不開都係日本菜，佢嘅魅力真係沒法擋！今次再到位於銅鑼灣嘅勝八食日本菜，好彩我哋有預先訂位，如果唔係就有排等喇！首先食個前菜，勝八沙律，除咗有基本嘅沙律菜之外，有豆腐粒、車厘茄粒，最特別嘅就係上面撒滿粒粒炸芋絲，食落口脆卜卜，菜又爽口。下一個就係我好鍾意食嘅小食，三文魚子海膽豆腐，粒粒鹹鹹地嘅三文魚子配上新鮮清甜嘅大大塊海膽，食落好fresh，好夾！跟著就犀利喇，時令刺身三食，包括有活螢光魷魚、系撚鯛、連子鯛，螢光魷魚煙煙韌韌，兩隻鯛魚都非常新鮮，一啲都唔腥，系撚鯛即係我哋平時食嘅紅衫魚，蘸醬油食，非常適合！食完刺身就食肉，呢個安格斯牛肉薄燒，入面包住蔥粒同炸蒜片，牛肉個味道依然好出，入口即熔，正！最後整番個招牌清酒煮蜆，蜆肉大大粒，又冇沙，清酒味啱啱好，係出色之作！梅酒巨峰提子梳打勝八嘅魅力太厲害，我下次會再幫襯！