Sodam Chicken (已結業)

Sodam chicken呢間喺銅鑼灣嘅韓式炸雞專門店，除左佢哋嘅炸雞放題好抵食之外，仲經常推出不少嘅期間限定口味，而呢次我哋去嘅時候就推出左極具東南亞嘅風味嘅炸雞同焗雞，分別係暹羅花生炸雞同埋冬蔭功焗雞。前者嘅喺表面淋上濃郁花生味嘅醬汁，同炸雞味道好夾，而後者食得出有好重嘅泰國香料，辣度適中，好似真係飲緊冬蔭功湯一樣。佢哋嘅放題仍然仲有一系列平時常駐嘅炸雞分別係甜酸，辣味，香草青檸，濃蒜，蜜糖芥末香蔥，檸檬柚子等。而無咁熱氣嘅焗雞都仍然有蜜糖蒜香，雙重芝士，韓風紫菜，噴火辣，BBQ香辣等口味，仲有大熱嘅咸蛋黃口味就炸雞同焗雞都有。佢哋嘅炸雞焗雞表現仍然好出色，唔會因為係放題嘅關係而有所下降，仍然做到皮脆肉嫩，雞肉肉汁豐腴，實屬難得。佢哋除左炸雞焗雞外，仲有提供薄餅同小食。薄餅佢哋就提供左四款口味，你只需點一份就能試哂四款口味。小食方面有兩款不同口味嘅薯條，有酸辣適中嘅泡菜，有酸酸清爽嘅蘿蔔，有兩款韓式嘅涼拌小食，好似水冷麵同埋魷魚，亦有香甜嘅牛油粟米同埋清爽解膩嘅黑醋汁沙律。