過客 (已易手) 新餐廳

間餐廳喺銅鑼灣嘅新開商業大廈頂層，環境 好舒適，裝修設計走清新風格，佈置簡潔乾淨，最緊要係個廁所，唔似一般餐廳濕笠笠逼逼澀澀，轉身先開到門，佢哋個廁所又大又乾淨，成個化妝間咁。餐廳樓底好高，兩邊全落地玻璃，日頭夠曬自然光，好開揚，坐喺近窗位飲嘢食飯，好有休閑feel，又有好大嘅露台位置，同朋友喺室內飲嘢又得，去露台睇住銅鑼灣風景吹下水又得，環境幾好。啲食物質素都好好，意粉軟硬度適中，牛腩又淋又入味，伴埋沙律食，有啲中西fusion感覺。平時唔係好飲得酒嘅我，試左老闆推介嘅餐廳signature飲品，據講係手工啤加原個鮮打檸檬成汁加埋一齊，味道好清新，啱曬唔係太識飲酒嘅女仔，我哋幾個女仔，飲完一杯又一杯，超正。仲有，老闆會成日過嚟同我地傾計，絕對唔介意你坐幾耐，嗰日同班姊妹由晚飯坐到夜晚十二點先肯走，非常盡興