華倫餐廳 (已結業)

港式茶餐廳周街都係，一般俾人嘅感覺都比較「豪邁」「霸氣」「那渣」，呢間禮頓道華倫餐廳，令我對茶記改觀。寬敞鋪面樓底好高，柔和嘅燈光，俾人好舒服嘅感覺，而且侍應uncle服務態度一流。當中呢份鹹蛋四寶飯，大大碟賣相「靚靚仔仔」，唔係求其斬俾你嗰隻！叉燒半肥瘦腍身，食落有蜜汁甜，仲有啲炭燒感覺。切雞香滑淡淡肉，唔似一般嗰啲「冚唪唥」都係骨！至於另外一樣招牌菜就係流沙西多士！話明係流沙 ，當然最緊要係夠「流」，見佢外型同一般差唔多，本身冇抱太大期望。點知一切開…嘩😱唔係講笑喎…奶黃即刻排山倒海咁湧出來，陣陣蛋香，食落甜而不漏，好鬆軟，入面仲咬到蛋黃顆粒。糖漿係另上，甜度可以自己調教。