阿賢麵線 (已結業)

之前見過有傳媒介紹過，咁啱呢日去開深水埗，就揾揾呢間台灣麵線試試。地點都易揾，方便到達。可能天氣凍凍哋，一去到冇咩人流，只有我同大佬兩個，食嘢枱櫈大多數都係喺舖頭出面，店內都有一張長枱面壁。我哋坐咗出面，餐牌係易拉架或者貼晒喺店舖周圍。見到有個大腸紅麵線餐，有一碗麵線、冬瓜茶同一款滷水小食，二話不說就走入舖頭收銀機前落柯打。雖然當時冇其他客人，不過都等咗一陣，應該即點即做啩！麵線送嚟時，應該係老闆娘嘅小姐用心介紹啲調味配料，有蒜汁同分大細辣嘅秘製菜脯，仲強調大辣菜脯真係好辣！我三款都加晒，大腸香濃，食到滷水味，麵線滑而唔會碎晒，正，食到台灣食過嘅味道，唔似XX雲X，又水又冇味，料又少，呢度完全相反，份量大，麵線多，唔會越食越稀。滷水雞脾size就細細隻，味道都可以。冬瓜茶，甜甜哋，飲落好似糖冬瓜水咁，跟餐OK嘅，單點我就唔會啦。為咗麵線我會再嚟，努力阿賢麵線！