伴日

營業中

休息中

呢間位於長洲後街嘅日式餐廳門面並唔顯眼，落地玻璃窗廚前簡單掛起日式布簾作為招牌，室內裝修簡約舒適，白色牆身搭上少量相片/裝飾，配木製枱櫈及柔和黃燈，播放日文歌，真心有遠離煩囂嘅感覺。食物種類都算多、有丼、定食、茶漬飯、冷麵、飯團，亦有兒童餐嘅選擇，甜品櫃仲有特色甜品。第一次嚟，想試下佢嘅set，叫左章魚燒定食、配燒飯團、前菜、昆布湯及飯品。燒飯團可以轉原味飯團或者加錢轉其他飯團甚至茶漬飯，好想試下茶漬飯，但又想試左佢個原set先，同埋未試過燒飯團，好想試下鬼滅好好味嘅燒飯團究竟係咩味，最終乜都無轉。前菜係蓮藕片，清脆爽口 （8/10）主食章魚燒章魚粒勁細粒、粉團為主，唔掂🫠 （3/10）燒飯團雖然乜餡都無、但味道有驚喜😍 兩面燒到少少飯焦好香、日本米飯粒軟熟、少少油喺面，咬落少少煙韌但又好易食，飯團又唔會一咬就散曬，無令我失望🥰 （8/10）昆布湯清淡略有甜味，搭配飯團幾夾。（8/10）份量嚟講女仔應該啱啱好，男仔嘅話略嫌唔係好夠。胃口大少少嘅朋友要認真考慮。總括嚟講可以encore，但強調建議唔好揀章魚燒！下次會想試茶漬飯。