大班樓 (已搬遷) 新店位置

長輩生日，來大班樓食精品中菜就最合適不過。咁啱長輩特別鍾意食魚頭，而香港又冇咩地方整得好食，大班樓真係最佳嘅選擇。今次食左好多個餸，分別有芋泥煙鴨盒，蒸蟶子，九層塔炒蜆，烏雞蟲草花燉湯，秘製叉燒，龍躉魚頭，清炒菜心，自家製臘味番薯煲仔飯，百花雞，同埋甜品。其中最令我驚艷嘅食物包括：九層塔炒蜆：味道非常有特色，有少少辣，同埋好濃郁嘅九層塔同蕃茄醬味，份量亦都好足夠；龍躉魚頭：味道有啲似水煮魚嗰種感覺，但又唔會太鹹太辣太濃，食得出係完全冇味精嘅。而且龍躉魚頭多肉，啲皮又好滑好和味。係我喺大班樓食過最鍾意嘅餸，基本上出邊冇可能食到呢道菜！清炒菜心：呢個真係經典，冇諗過一碟青菜都可以炒到咁好食，入面鮮嫩得黎又有鑊氣，調味剛剛好。真係非一般嘅功夫菜。杞子雪糕：my all time favourite，呢個甜品真係必食，次次嚟到一定要食😋香濃嘅奶味，正！其實其他餸都好食，不過相對來講我會鍾意以上幾個餸。雖然價錢都唔平，但真係食得出一分錢一分貨，全部都係好紮實嘅功夫菜。食材新鮮，冇味精！喺香港食到呢個水平嘅中菜實在難得。