豪園麵家 (已結業)

有時啲朋友想傾吓偈就會過嚟，貪佢啲嘢好食，性價比都算高，佢個乳鴿好好食可惜今日冇貨，經店員介紹吓叫左炸子雞：炸得好脆，亦都唔會太老，黑椒薯仔牛柳粒：今日比平時更有水準，外脆內軟，沙嗲牛肉炒芥蘭：下次要book mark唔好叫佢，一堆醬，亦都冇炒嗰種鑊氣。到第二轉，唔知係咪因為臨收工，我哋叫咗小炒王：韭菜花好嫩口，配菜好食，腰果份量合適，乾炒牛河：欣賞佢油唔算多，鑊氣爭少少，但係真係太淡。豉油王鵝腸：啲脂肪已經起晒，食落去口感很好，但係嗰個豉油王嘅味道有少少似滾水開稀咗。乾炒牛河同豉油王鵝腸個味道都好淡。感覺唔係同一個師傅整，回憶返以往臨收工叫嘅嘢食味道都會有少少分別架，建議大家早少少嗌定晒要嘅嘢。環境方面，好欣賞佢哋佢哋有人情味，我哋今日一行三人，叫咗兩個有跟湯同飯嘅餸，佢見我哋有三個人都得咗三碗湯俾我哋，同埋佢哋唔趕客。