圓山飯店 (裝修中)

約了一位長輩食飯，需要揀間好坐又就到長輩口味嘅餐廳，就踏上左呢間一直覺得好神秘嘅餐廳。平時去飲野或者美麗華都會見到呢間餐廳，但從來無食過。約左6點幾到，時間尚早，未算好多人，晏多少少就full house，好多都係一家大細食，仲有啲日本遊客。值得一讚嘅係餐廳有提供少見啲嘅菊花，仲要回沖咗幾次都仲有味。一坐底就有碟調味咸鮮嘅青瓜。🍴避風塘炒蟹原來餐牌力推緊呢碟，難怪人人都叫，$298兩個人份量係一斤左右，炸蒜個調味好香口，辣度屬於微辣。就連蟹鉗都好入味，絕對係惹味又邪惡嘅一道菜。🍴蠔仔煎蛋蠔仔大隻厚肉，但佢配個橙色嘅醬汁食唔慣，夾左避風塘炒蟹啲炸蒜超正。🍴冰鎮咕嚕肉上台時有啲乾冰，無諗過酒樓都咁打卡feel。咕嚕肉個皮仲脆嘅，必須要送飯。🍴豬油渣炒菜廚房將菜心老嘅位都刨走曬，得返嫩嘅部份。話用豬油渣炒，但出奇地個菜唔油膩，菜心仲好爽脆。如果想同屋企人食飯，呢間出品係水準之上，店員仲好識做，會主動問使唔使幫手影相。