金船長餐廳 (已結業)

聽過好多人講大角咀既金船長啲嘢食幾好，一路都想試不過一路都冇經過大角咀區。 今晚突然有機會到大角咀區就行過黎試下啦。入到餐廳見到牆上面貼有好多嘢食相，見到有一個好似木糠布甸嘅薄餅叫做黑松露薄餅，我見到個外型幾得意又跟平時食開嘅薄餅唔一樣就叫一個嚟試下。黑松露薄餅- 其實係雙層餅底夾住濃郁嘅黑松露醬，薄餅面亦都灑上咗好多芝士粉。一上枱已經聞到好香嘅味道，一啖咬入口食到過皮好脆中間又有香濃既黑松露香氣加上芝士嘅味道我覺得超好味。焗田螺 - 有別於一般餐廳嘅菜式， 田螺並不是配薯蓉而是配了幾片多士， 多士配田螺嘅香草醬同樣美味可口。炸軟殼蟹 - 原隻軟殼蟹上檯，件件都炸到脆卜卜 ，唔錯。蘑菇汁燒西冷牛扒- 西冷分量都幾大，肉質還可以，我叫咗5成熟， 味道ok。黑松露意大利飯 - 勁重黑松露味，松露控必選。紅豆抹茶奶昔- 未上枱之前以為會好重奶味， 試完覺得係同一般奶昔不同，味道都幾清新唔會過甜。