Simplylife Bakery Cafe (已結業)

食過好多間分店，包括已經執笠嘅奧海城分店，覺得食物唔錯，環境都OK。葵芳呢間開咗唔算耐，餐廳環境開闊，食物味道可以接受。本來仲幾開心附近終於開咗一間分店，但係今次經歷真係令人失望。一入門職員告知限時75分鐘，聽到有啲窒一窒，原來宜家食西餐仲少時間過食快餐，不夠都係食餐飯，又唔係嚟hea，就繼續入座。一落座幾分鐘已經落單，上菜算快，我哋都密密食，無停手。食到後面，離落單時間不到一小時嘅時候就有職員攞住張單嚟叫埋單，由於當時用手食緊漢堡，又未到時間，便諗住食埋先找數。過咗幾分鐘，職員又過嚟表示用餐時間已過，叫我哋埋單。但當時我哋碟上仍然有少量食物，而且嚟落單時間並沒有超過75分鐘，職員已經想趕食客走，而且語氣並不友好！ 本來都無打算賴死唔走，但係俾客人食完野先離開，差幾分鐘都唔得？本來職員好好講，我哋都會儘快食完，甚至可以自行結帳離座！但係職員態度好似我哋爭佢錢咁，真係令人食到最後一肚子氣！況且明明成個餐廳都無列明話要75分鐘離座！如果大家想搵食得舒適開心嘅西餐，就千奇唔好考慮呢間！最可惜係奧海城已經無得食！唯有對Simplylife講bye bye！