裕一品四川雲南米線 (已結業)

星期日都要過灣仔去上堂，實在不情願去，但又要考試，當返左一日工，個course值2000大元，本身已經好攰，都硬住頭皮去上。12:00放lunch，完全唔熟地理環境既我，傻下傻下走落斜路，同行有一個同班既女仔，各自都冇伴食飯，所以就一齊食冇咁尷尬。就近見到一間米線舖，個名都幾熟，記得我北角娘家都有一間，唔洗等位就有得坐，唔考慮就入左去。主要都係食麻辣/酸辣米線，$31起一碗有一個餸，另外再加餸就加$6，隨便食個lunch就冇特別加餸了。等左成10分鐘先有得食，上菜時間過慢。白菜水餃小窩米線 (酸辣7小辣) $31呢度既辣分左好多種級別，見隔離枱話3小辣好辣，唔太食得辣既我隨便揀左7小辣，黎到湯底望落冇紅色，但其實係有辣味的，呢個辣度啱哂我，少少辣又唔會太嗆喉，可惜個酸味就唔太惹味。白菜水餃有2隻，個皮好薄，食到有白菜同肉粒，味道不太濃。米線質地還可以，都夠滑。凍飲加$4同我一齊食既女仔都覺得，平平無奇的一碗麵，醫左肚就算。