名 料理 (已結業)

同一般鬧市大街高級日本料理唔同，名料理位處遠離塵囂嘅大尾督，附近有大量車位，十分方便，食完仲可以去壩散下步睇星星，男女朋友去真係一流！食物質素有驚喜，魚生飛機送港，非常新鮮，質素比放題高，但當然價錢都較高，適合負擔到又咀刁嘅食家。甲羅燒亦有驚喜，鮮味十足，啖啖蟹膏。燒羊架、牛柳粒又juicy醃得又夠味，燒三文魚頭魚油甘香，不論生野同燒物都係高水準發揮。飲品方面有靚日本gin “六”等選擇，包羅萬有。小編揸左車，試左杯荔枝梳打，都溝得好飲！最後食左個炒烏冬，火候十足，落夠海鮮配料，每個細節都計算得岩岩好！整體環境一流，有户外户內，室外晚上涼涼地格外有情調，仲係寵物友善餐廳，老板娘都好好傾好殷勤，一眾熱愛遊車河車友或單車友踩完單車不妨一試！