棋哥燒鵝 (已結業)

因應疫情關係，全港食肆晚上禁止堂食，外賣生意成為晚市的唯一出路，無得堂食，相信好多人同我一樣，選擇回家食住家飯，間中更會斬料加餸。今晚一於去棋哥燒鵝買屋企人的至愛.......燒鵝。一般人都鍾情下莊，貪佢夠肥美，不過我郤偏愛上莊啖啖肉的口感。一落單，燒味師師傅便會從掛滿各種燒味的燒味架上取下燒鵝，接着手起刀落，斬出一件件大小均等的燒味，再整整齊齊放入外賣盒內，樓面姐姐幫手將盒入袋，紮好袋口，最後交到客人手上。在回家途中，燒鵝的香味隨著餘温散發，隔着口罩也隠隠聞到。返到家，第一時間洗手，再解開外賣袋，一股濃烈的煙熏燒鵝味湧出來，盒內的燒鵝皮色澤光亮，以荔枝柴煙熏燒過的燒鵝味道特別濃郁，叫人垂涎。急不及待先嘗一口，外皮挺身皮下脂肪少，皮脆肉嫩，鵝汁豐富，甘香惹味，肉質豐厚，如果再加碗米粉或者白飯一齊食，幹掉整盒上莊應該絶無難度。雖然不似堂食，可以品嚐到燒鵝最好最滋味的狀態， 不過我對外賣的質素也十分滿意，連跟餐的漿汁也不用點，原汁原味，正!