隨變燒烤麻辣雞煲

營業中

休息中

其實知道有呢間嘢好耐好耐好耐，不過因為太多選擇都冇食過，直到近日朋友圈提起過呢間，就趁今晚去食下。我哋兩個人叫咗隨變麻辣雞煲（全雞 $208），原本想要中辣，不過個哥哥仔話佢哋啲辣比出面重手同勁好多，建議我哋真係唔夠辣先加，咁就聽佢話改做小辣。呢度個汁比出面稀身，不過都清楚見到有乾辣椒、洋蔥、芫茜、青椒、花椒八角，雞肉食起上嚟幾滑，食一啖個嘴唇就已經辣到麻痺咗。另外叫咗啲小食：麻辣豬耳（$38），又係辣辣哋，都幾爽口。燒牛舌心（$40）、燒香菇（$20），味道分別唔大，都係用孜然粉調味，兩款嚟講牛舌心會比較好食，冇咁乾身。我哋仲叫咗啲火鍋料，例如有韭菜餃、雲吞、皇帝菜、金菇、雞脾菇、魚腐、牛筋丸同響鈴等等，除咗響鈴唔脆之外，其他都正常，另外再加咗嘢飲。