潮家宴

營業中

休息中

朋友帶我食私房菜， 疫情之後潮家宴開放左會員以外都可以食☺️ 印象中潮洲打冷都比較地踎， 私房菜就好好坐， 環境乾淨唔會好嘈。呢間出名食翅，但我地散叫小菜全部都好好食。坐底叫左小食，醃蘿蔔擺到成朵花咁， 口感爽脆。新鮮炸魚片真係食到停唔到口，淋上咸蛋黃汁，比即食魚片好食超多。九肚魚好滑而且無骨， 聽講鳳尾魚比較罕有啲，下次可以試試～豆腐同一般唔同， 結實d，有少少似魚腐。有2個醬可以點， 我鐘意柚子醬多過甜醬，伴碟芋頭絲都唔好放過， 好似薯片咁脆。滷水鵝唔會好油膩，底下有百頁豆腐。薄餅用木薯粉做，質地比較煙靭，蘿蔔清甜多水，上面好多腰果。胡椒豬肚湯好辣，湯渣另上。第一次見黃金卷， 顧名思義有咸蛋黃，仲有南瓜蓉，口感幾特別。潮洲菜必食反沙芋， 餐廳仲拉左麥芽糖，好懷舊。最後食埋八寶湯係紅棗雪耳小丸子糖水。