觀塘雀會 (已結業)

天有不測風雲，幾十年一遇，10月仲掛8號波，天賜一日假期，最開心不外乎打番幾圈。觀塘舊區包羅萬有，娛樂不假外求。呢間雀會地點相當隱蔽，如果唔係地膽都唔容易搵到呢間老字號。店內設有用餐區，方便雀友食完先開局，亦會做街客生意。厨房除咗小菜，仲有碟頭飯，亦有標準茶記水吧提供即食麵同三文治多士，飲品都同茶餐廳差唔多，同時有啤酒供應。為求方便，今晚試咗碟芙蓉蛋飯同菜芛雞柳飯。菜芛雞柳飯無論賣相，用料都極之求其，兩樣料都好似無關係咁，而且汁都無味，失手之作。芙蓉蛋飯芙蓉蛋用料足，有火腿蝦仁韮黃芽菜，蛋炒得兩面焦香，微甜，外脆內嫩，配小碟甜豉油，比起酒樓出品亦豪不遜色！如果可以用番半肥瘦叉燒同葱花，就更加完美。驚喜往往係結果比預期好，喺無預期會有好嘢食嘅雀會，食到炒功一流嘅碟頭飯，或者，會係我未來多啲嚟開枱嘅藉口。