ChirChir Fusion Chicken Factory (已結業)

CHIR CHIR CHICKEN主打韓式炸雞，食炸雞梗係要用手食先好食！店舖會貼心咁提供手套，咁就可以豪邁原始地咁用餐！ 豪華炸雞拼盤分別係薯條 炸蝦 炸雞以及烤雞，全部都係新鮮出爐，熱辣辣嘅炸物點會唔好食呢？雖然全部油炸，但炸得乾身又夠脆，所以唔會過份油膩。加上有酸酸甜甜既醬汁點下，一盤炸物意外地好快就被秒殺。芝士薯條非常之大碟，幼薯條撒上大量芝士粉同芝士醬，薯仔配搭鹹香既芝士同甜甜既蜜糖芥末醬～就算份量好多，呢個芝士薯條惹味又濃郁，芝士控一定啱晒！麵包芝士炸雞一定要趁熱食！如果唔係麵包會淋哂，口感會爭好遠！呢個炸雞相對無咁脆身，炸雞個醬似咕嚕肉隻甜酸醬，所以都幾開胃。炸彈飯團粒粒都好大粒。飯團外層包住勁多紫菜碎同芝麻粒，飯團加左麻油調味，幾樣野加埋一齊食絕對係平凡中嘅美味！沙律有芒果，車厘茄、藍莓、生菜撈埋乳酪醬，可以中和一下味蕾，平衡一下炸雞嘅油膩感。