港灣茶餐廳

營業中

休息中

話說我一走入餐廳發現無單丁位，全部要搭枱，咁我咪諗住買外賣。點知行到入去見到成個 corner 位七八張枱無人坐，咁我就同侍應妹妹示意話坐啦，回應竟係清潔中唔比坐 ﹗早餐煩忙時間清潔？﹗您講笑定搵藉口呀？而且我唔見有人係度清潔喎，我只係見到一塵不染好乾淨乍喎。咁我梗即時黑面 ﹗算數，剛有客離開，咁我一個人坐落張二人枱，諗住可以靜靜地舒舒服服獨自嘆個早餐。誰不知唔夠三分鐘，叫個客埋黎搭枱 ﹗有無問過我呀？﹗係咪一定要比您搭既先？﹗火都黎埋 ﹗火係因為聲都唔聲就坐落黎，我依家唔係幫襯緊街邊檔或大排檔呀，過份呀 ﹗服務不殷勤不周到，目無表情無笑容，食都食得唔開胃啦，有待改善，再培訓 ﹗午餐肉唔夠熱既，只微暖，所以特別咸囉，雖則預左係煎定。太陽蛋屬靚貨，深橙黃色蛋黃，香濃蛋黃味，正。牛油餐包，夠軟墊，ok 啦，不過牛油少啲囉，咪咁孤寒啦。琴日朝、前日朝都係係度食同一個沙嗲牛出前一丁跟太陽蛋，只係塊肉轉一轉啫。今日超水準既沙嗲牛肉出前一丁，為之驚嘆 ﹗一食落口就知道牛肉係新鮮製造，唔係乾增增有死屍味既隔夜貨、唔係鞋烚烚黑蚊蚊既罐頭貨，嫰滑味鮮。沙嗲汁打得濃厚適中，味道香甜，不咸不膩，色澤鮮明吸引