財記海鮮火鍋活魚刺身

營業中

休息中

雖然已經進入炎夏，但無損我地打邊爐嘅雅興，今次揀左間可以食埋刺身嘅火鍋店。入到去環境好光猛，仲有電視睇，可以同朋友邊食邊討論。前菜有碟酸青瓜，平心而論係醃得幾好，酸度剛剛好。刺身方面我地叫左幾樣試試，點知真係幾好味喎，好新鮮，作為一間海鮮火鍋店，刺身有咁嘅質素好難得。三文魚腩刺身好肥厚，帆立貝刺身都好正！而海膽就試左半板，夾住四洲紫菜食，可以解膩。值得一提係個wasabi都好好味。除左刺身仲試左鹽燒鮑魚，建議用較剪剪開食比較方便，都燒得幾好食，叫黎試下都無壞，大家雖然攰但都食得好開心滿意！然後到火鍋出場，我地叫左鴛鴦鍋，清湯同沙爹。叫左手切肥牛，個牛肉靚就唔洗講，最重要係友人淥得好有水準！流沙芝士獅子狗一碟份量都好大，3個人食都食唔哂，有別於平時食開嘅芝心獅子狗，呢個芝士係釀入中間個窿，一咬超濃芝士味，食得多會漏。豬紅同墨魚滑無好濃嘅味精味，取而代之係一種清新健康嘅感覺。最後食埋稻庭烏冬，好幼好滑，食完好滿足。