Oddies (已結業)

接左肥柑太放工，佢話有少少肚餓，於是帶佢搵野食，睇到呢間野人頭湧湧，於是轉身射個三分波行去排隊啦。個餐牌簡約得黎好吸引，我估人人都會畀最大左既雞蛋仔雪糕杯吸引左，但我地返其道而行，各有各叫一款野食，我就叫雪糕，柑太就叫左雞蛋仔。係等緊既時間，細心睇下個餐牌，發覺字太細，而雪糕杯既材料又太多，未睇晒就已經叫到我囉野我既66%黑朱古力雪糕($22)，60%左右既黑朱古力我平時都有食，食落去甜度偏低，有少少澀澀地苦既朱古力味道係味蕾稍為停留，但又唔係苦到令人皺眉既苦，而係苦中帶甘，猶如醇酒一種沉典過濃郁既味道。而雪糕本身既黏性好高，入口後仲有時間可以感受到雪糕係口入面溶化既感覺，絕對係一試難忘。柑太既泡菜年糕雞蛋仔($22)，第一啖食落有少少辣泡菜感覺，再食多幾啖就食到入面真係混入左年糕同泡菜，成個雞蛋仔食落鬆鬆化化，脆口感大減，但換黎一種似食緊一個熱辣辣既年糕餅感覺。