正斗粥麵專家 (新城市廣場一期)

營業中

休息中

經過近日雲吞麵的風波，全城FACEBOOK雲吞麵狂洗版，冇理由唔嚟襯下熱鬧，呢間新開嘅沙田正斗都係第一次食，地點就當然靚啦，係最當旺嘅餐廳地下樓層，裝修都算好時尚，好鍾意D燈飾，好似一個個蒲公英。今日嚟到雲吞麵係必點項目，叫一碗細蓉慢慢品嚐，麵條夠彈牙，唔重鹼水味，雲吞大小適中，每粒都好足料，湯頭大地魚味夠濃，蝦子味亦夠，韭黃夠香脆，可以稱得上係一碗上等嘅雲吞麵。炸兩，腸粉皮拉得夠薄，油條食落仲係脆嘅，食完一舊又一舊，真係停唔到口。三拼粥，點咗皮蛋，牛肉，肉丸粥，粥夠綿夠杰，味道夠晒鮮味，牛肉做到剛剛熟，夠嫩，肉丸調味一流，皮蛋係流心貨色，夠晒香濃。唔知係唔係最近雲吞麵的風波帶動，今晚所見呢間正斗並冇比最近嘅淡市影響，成晚都不斷有客人入座，平日嚟講生意算好好，所以邊個話一定要食鮑，參，翅，肚先係算美食，食物不在乎價值，只有好食與唔好食。