ODEA (已結業)

今次係Odea呢餐飯，整體體驗幾好。首先，服務真係好好，Waiter會幫女士拉櫈同鋪餐巾，送多咗一樣餐前小食俾我哋，上完每一道菜都會介紹下嗰道菜係咩，同埋建議食法，當日我哋係慶祝生日，Waiter仲幫我哋將啲嘢擺返靚個位影相。然後，啲食物真係好精緻，感受到廚師係用心去準備，色香味俱全。我唔敢講每一樣都啱自己口味，好多款食物對於我來講都係新奇嘅體驗，食物嘅味道有好多層次，令我更加用心去品嘗每一啖嘅味道。我覺得嗰一餐食物嘅口感整體都好好，我諗咗好耐要點形容⋯第一，我覺得食物全部都「唔乾」。點計咁講呢，唔係講緊佢地嘅食物有冇汁，而係啲食物都煮得啱啱好，特別係啲肉類，無論係鱈魚、龍蝦、豬架，都唔會過熟，入口非常軟熟，食物嘅水份都保留得好好。特別係龍蝦，真係我食過最好食嘅龍蝦🦞！佢嘅熟度係啱啱好，係其他地方食過嘅龍蝦大多數都過熟，食落似擦紙膠，所以我一直以為龍蝦就係咁嘅口感，無諗過龍蝦原來可以咁好食🥹第二，食物有顧及食用者嘅體驗，上菜時嘅溫度都啱啱好，啲食物係「暖」嘅 — 唔係一早煮好曬擺到凍咗，唔係熱到辣口，而係入口覺得溫暖，啱啱好感受到食物嘅質感同味道，令我真心覺得我真係好享受呢一餐嘅食物。