老三火鍋 (已結業)

朋友們話好耐無一齊食過飯，所以happy Friday，大家一齊去食餐好嘅。打邊爐就食得多啦，咩清湯、麻辣、沙嗲都食到唔想食，所以今次揀嘅餐廳，係為左個湯底而黎。呢度出名就係個秘制老鴨鍋，幾乎枱枱都點佢。個鍋黎到，我地一人裝一碗湯飲下，個湯好鮮味，個面無乜肥膏浮面，飲落有少少藥材味，但明顯非常真材實料嘅鴨湯，果然唔錯，愈飲愈想飲。至於鴨肉亦算嫩滑，輕輕力已能撕開，唔會話好硬好乾，肉味依然濃郁。我地個晚都叫左好多料打邊爐，有幾個比較出色，可以講下。首推本地手切肥牛，細油分佈細密，唔會話一舊舊肥膏，然而厚薄適中，肉質香嫩，咬薄油香陣陣，輕輕滾一滾就食得。另一個推介係醉雞丸，望落去成舊橙色，睇唔出係舊雞，但熟左一食，認真過癮。一咬d汁噴出黎，要小心睇熱，佢個味香茅味非常濃烈，但肉質彈牙，確實係有趣。仲有個魚卜，非常新鮮，一抽拎出黎先剪開。食落一d鯹未都無，咬落膠質非常重，好似花膠咁滑，值得一試。總括黎講，d料都好新鮮，個鴨湯由其出色，黎到一定要一試。