滿樂中菜 (已結業)

香港中餐廳真係好多，今日朋友介紹戲曲中心這間中菜，因為價錢不錯，見到環境唔錯，今晚來試試。餐廳而家晚市有啲套餐真係幾抵豐儉由人，$400一位都食得唔錯。今日叫咗個套餐，前菜是燒腩仔，外皮香脆，燒腩仔入口好鬆軟，咬落去肥瘦啱啱好，點上芥辣，非常不錯。簡單嘅拍青瓜，青瓜爽脆，少少酸甜，好開胃。海皇三絲羹，有蝦肉魚肉及蛋白，入口幾香滑，調味唔錯有少少香菇同埋韮黃，味道互相配合。蜜糖汁叉燒皇，入口暖暖地，叉燒味道非常好，旁邊有少少窿邊，夠香脆又有油氣，叉燒味道不會死鹹，旁邊仲有少少蠔油豆伴碟。鴛鴦胡椒焗中蝦，用上原粒新鮮及乾胡椒，香氣好吸引帶辛辣，海中蝦已經開邊及夠乾身，所以胡椒香味可以迫入蝦身，入口有兩種層次的胡椒香。南瓜炒米粉，有蝦肉，蝦乾同埋鹹肉，充滿海鮮鹹香味，橙色嘅南瓜條落得好夠多，所以米粉多了一種蔬菜的甜味，味道層次更豐富。整體食物算係幾清淡，有鮮甜味，雖然裝修好似好新派，但係服務好到位，用手吃蝦嘅時候，會遞上濕紙巾，仲要幫你打開埋，之後仲有久違了的熱茶加檸檬片洗水，擔心你太燙手，仲加小冰塊，咁貼身嘅服務，中餐真係少有，餐廳裝修好雅致，價錢又唔錯，值得推介！