湯•米 (已易手) 新餐廳

朋友推介去旺角搜尋美食，之前佢食過一間台式臭臭鍋話一人一鍋，而且飲品非常有特色，就決定去試吓。一入門口已經係收銀處，收銀處上面標明各款特色台式飲品嘅名稱同埋價錢，亦都有好多客人專程入嚟買杯飲品就走，可見飲品非常有特色。餐牌上圖文並茂，每一款食物嘅圖片都非常吸引。除此之外，仲有小食、火鍋配料追加項目，食物款式多元化。由於太肚餓，先叫了一份小食-麻辣臭豆腐。麻辣臭豆腐望落去都已經覺得好辣，食落去味道入味，食到我個嘴唇都麻痹了。女士們當然要滋補一下，我就揀選了藥膳豚肉鍋，奶白色嘅湯底原來係非常足料嘅藥膳味道，我選擇咗唔辣，入面嘅豆腐、娃娃菜，仲有豚肉都非常新鮮入味。朋友嘅巴蜀烤魚鍋賣相都非常吸引，真係有一大塊好厚身嘅烤魚放喺火鍋面頭，食落去魚皮香脆、魚肉唔多骨，朋友都大讚好食。食完叫一杯純品凍烏龍，可以解辣之餘，仲可以爽一爽喉嚨，飲完好舒暢。