達人烤肉 (已結業)

作為食肉獸既我，所謂既“韓燒”食過好多次，不過都係D醃肉，質素唔高，為求百零蚊填飽個肚。而今日經朋友推介，就一行六人去左呢間由韓國人主理既正宗韓燒。 入到鋪第一印象係好新淨同無油煙味，每個燒爐上既獨立抽風做得唔錯。另一個抵讚point係餐廳座位都係中空既，可以打開放低個人物品，完全避免油彈同吸味。落order後，就有個韓國女仔專門serve我地。由準備配菜(食完可以refill)，其後燒烤，切肉，講解調味配撘都係佢負責。配菜當中我最鍾意爐邊既芝士粟米"右下果款"，非常香濃(一開始d芝士未溶之前我以為係碎蛋)肉類試左好幾款，雖然個人鍾意食牛多過豬，不過今日總括黎講，個人認為豬好食過牛。我推介以下三款：竹筒五花腩，個韓國女仔staff邊切邊話每件最好厚8mm,肉質彈牙之餘肉同脂肪比例好好。秘制牛仔骨(已切)，牛味重，充滿肉汁。香辣芝士豬排，呢個唔洗自己燒，整好哂先上枱。韓式香辣味唔刺激，加埋芝士味道好豐富，滿足哂我對芝士既慾望！(餐廳仲貼心提供埋膠手套)依家新鋪開張做緊優惠：八折同免費飲品一杯，不過唔知做到幾時。最後埋單每人百六蚊，以今日既質素黎講都物有所值！