小火焰韓式咖啡廳 (金山樓) (已結業)

今日同大家推介呢間好有韓國 style嘅餐廳，佢有種類繁多嘅菜式，好似有炸雞類、一啲石頭飯、仲有好多韓國嘅特色菜式佢都有，睇到你花多眼亂，如果揀唔到佢有啲套餐俾你選擇，好似我哋咁嗰日就揀咗個二人套餐，抵食得來又可以幫你選擇下，我哋嗰餐有一個前菜，三個主菜，仲有甜品同埋兩杯嘢飲，首先講吓個前菜，香芒炸雞沙律，啲芒果好甜，炸雞唔會太過多粉，啲菜沙律非常新鮮，酸酸地好開胃，之後個韓燒豬頸肉，燒得啱啱好，面頭有啲韓式醬汁，點嚟食非常好食，至於個肥牛粉絲鍋，成個鍋啲粉絲入晒牛味，牛肉又唔會太過煙韌，另外，嗰個牛肉水冷麵更加係夏天好嘢食，成個麵凍冰冰，啲麵又好爽，消暑一流，值得一題係佢個嘢飲，我加錢叫咗一個青蘋果熱情果梳打，呢個梳打非常好飲，有濃烈嘅青蘋果同埋熱情果味道，成個感覺都好清新，食完晒所有嘢，梗係要食個甜品做結尾啦，佢個牛乳奶凍，好好食唔會太甜又有牛奶嘅味道，值得一試。