Seoulmate (京都廣場) (已結業)

<烏卒卒火山岩漿泡菜芝士炒飯，$148>火山飯好特別，個樣仲好吸睛！打卡絕對一流！個火山係用蛋白打泡做成，上面有隻生蛋，而入面就係芝士泡菜炒飯。成個概念好有創意，而且賣相好靚！除左個樣好靚之外，個飯都唔錯，不過就差少少芝士嘅味道。而且個蛋白嘅火山外殻我覺得麻麻。提一提返個飯比想像之中辣，怕辣嘅朋友就要留意。相反，好似我咁鐘意食辣嘅就可以一試。<和牛煎太陽蛋漢堡配甜薯條，$128>呢個漢堡唔係韓國菜，但係整得都唔錯。漢堡嘅兩塊麵包都有先烘過，所以都帶點香脆。入面嘅生菜同蕃茄都好多汁好新鮮，配埋芝士同和牛漢堡扒係唔錯嘅。甜薯條都好好食，唔會炸到好油好膩，食落又甜又粉。<韓國荷蘭寶寶班戟同雪糕，$62>最後呢個甜品對佢有少少失望，或者我地本身太大期望。食落好似整得過火，個pancake偏厚偏實，無好滑嘅感覺。但係配埋個雪糕、煉奶同花生醬都唔錯。