Cafe Aboong HK (已結業)

離離原上草，一歲一枯榮，韓風襲港，各式韓國食肆先仆後繼進駐旺角呢個英雄地。作為消費者，當然樂見有花齊放。但更重要係，究竟好唔好食？有無賣點？所以見雜誌報導過，就試吓呢間新舖。 原味乳酪鯛魚燒$35一條開口日式鯛魚燒做甜筒就係呢間舖嘅賣點，再喺魚口中盛入低卡路里乳酪，灑上朱古力醬同花生碎就大功告成。熱辣辣嘅鯛魚燒配凍冰冰酸味味嘅乳酪。乳酪味道比較接近益力多，酸味同甜味都特出，但朱古力醬係熱嘅，冷熱交融感覺好特別，鯛魚筒外型除咗吸引，食落都尚算鬆脆，本身有好香蛋味，微甜同埋有少少辣手，天氣凍拎住食會有暖手蛋嘅感覺。期待會有其他做型嘅乳酪筒，會令我有再一次幫襯嘅衝動。