Milk Bar Cafe

營業中

休息中

喺instagram見到呢間cafe差啲以為係韓國嚟，飲品、食物、餐具擺盤同裝修都好韓風。聽講weekend好多人要等好耐位，所以我就搵日平日嚟等開門。比開門時間早咗三分鐘到，已經有一個女仔等緊位。戶外有幾個位，係一個簡單得嚟幾靚嘅打卡位。Cafe除咗基本嘅咖啡同茶之外，仲有幾款特色飲品。食物方面就只有不同口味嘅croffle同是日蛋糕。我揀咗blue latte同cream butter croffle。落單時店員話咖啡要等耐少少，由於當時少客所以只等咗幾分鐘。漸變色嘅blue latte好靚，底層藍色糖漿，中間係牛奶，面頭係濃縮咖啡。底層藍色糖漿係柑橘糖漿，如果唔鍾意咖啡太甜就唔好攪拌太多下，咁就唔怕飲到好大陣糖漿味。咖啡唔會太苦，味道唔錯。Cream butter croffle雖然用紙碟上，但個樣都好靚。忌廉食落好滑，重奶味而且唔會過甜。Croffle即係用牛角包麵團整嘅waffle，食落面頭少少酥脆，而且有牛油香雖然飲品同食物定價都比較進取，但係質素唔錯而且睇得出店主幾有心思。下次都會再嚟試下其他飲品同其他口味嘅croffle。