南小館 (已結業)

一行五人有大人有細路，週末中午時分誤打誤撞嚟到呢間南小館，未入去已經畀門口宣傳嘅$29隻乳鴿吸引咗，結果抱著一試無妨嘅心態入去。午市餐牌選擇算多，有前菜、點心、小炒、特別小食等類別。叫咗鹵水蛋五花腩，兩隻乳鴿，陳皮蝦、魚湯麵，雲吞雞湯，小籠包，燒賣等。另外再叫咗兩杯台式飲品（奶蓋士多啤梨），因為而家做緊第二杯半價。- 乳鴿算大隻，$29/隻真心係半賣半送。- 小籠包一籠5隻普通尚可。- 鹵水蛋五花腩超好食！五花腩滑口但唔覺油膩，應該係燜煮夠耐嘅成果。- 魚湯麵中上，稍嫌魚肉唔夠多，湯底唔鹹。- 雲吞雞湯中上，比上不足比下有餘。- 陳皮蝦賣$88有大概10隻，先酥炸後搵柚子蜜加陳皮絲番兜，口感唔錯而且菜式特別，值得推介！- 嘢飲算中上，$2x一杯第二杯半價即$4x有兩杯。- 最後反而想講係茶位嗰杯茶，應該係玄米茶嚟，清香而又啱大人細路飲！埋單連加一大概$700。以5人行嚟講，唔洗等位環境企理菜式選擇以致出品大都中上，可以再來幫襯嘅地方！