酒屋一杯喜

營業中

休息中

天后清風街向來都係著名食街之一，餐廳多到令人三心兩意唔知食咩好，不過呢間店門口有大大隻紅圈「喜」字招牌就幾引人注目。餐廳是日本居酒屋模式，主打食物有刺身、壽司、炸物、燒物、天婦羅、卷物等等，店內和風格調的裝潢設計休閒寫意，面積大到設有獨立廂房，店員有提及逢星期二晚仲有現場Live band演出，同朋友食完飯飲住酒傾計聽下歌都幾有氣氛。講返食物先，今餐算細食，真係純粹為了同好友聚聚傾計。先來一份和製酒盜芝士，咸鮮味非常濃郁，再加上忌廉芝士，就咁食會容易有點膩，不過夾埋餅乾食又確係一流。香煎鵝肝吐司的鵝肝真係入口即溶勁甘香好邪惡。壽司方面，點了一份盛合，包括赤身、魷魚、深海池魚、真鯛及帆立貝，另外再加中拖羅，每款都切得算厚身，當中入口較清甜爽脆的真鯛，同埋有甘香魚油脂的中拖羅非常推薦。至於串燒，豆腐及雞中翼都OK，覺得有趣的反而是第一次食紫蘇雞皮蝦卷，三黃雞皮燒得香脆，包著海蝦及紫蘇葉，蝦肉彈牙，紫蘇葉夾埋調味鹽的味道增添了味蕾多層次的香氣與風味口感。最後食碗暖笠笠的豚骨叉燒拉麵，濃郁香醇的豚骨濃湯令人幾乎全部飲晒，拉麵軟硬適中，配叉燒肉片一齊食都幾好味。