星滙演 (裝修中)

爆哂假又搶唔到機票，唯有繼續留港消費。今日攞咗半日假，同朋友去咗位於尖沙咀中心嘅星滙演，呢度嘅環境真係攞滿分，無敵大海景遇上藍天白雲好天氣，大家都心情大靚。午市套餐可選擇湯或沙律，我同朋友就最鍾意各選一款開心share。無論你選擇湯抑或沙律，都會奉上餐包，餐包上有啲大燕麥，而包就比較濕潤。是日餐湯係南瓜湯，有南瓜香之餘仲好creamy。沙律除咗有沙律菜同車厘茄，仲有豆腐同鷹嘴豆，配上胡麻醬感覺清新。既然諗住慢慢坐，當然要叫好西慢慢嘆，揀咗美國頂級西冷配川式炒雜菜，首先佢嘅牛扒生熟度控制得好好，並且已經預先切好，整齊排列上碟，而川式炒雜菜原來都冇乜辣味，不過用上中式香料味道係唔錯。意大利牛肉燴飯份量相當多，用上免治牛肉感覺有啲似窩蛋牛肉飯，配上意大利飯，感覺就更濕潤，口感更豐富。午市套餐仲配埋甜品，真係好抵食。黑森林蛋糕味道唔太甜，海綿蛋糕質感亦鬆軟。巨峰提子卷放入口已經有陣陣嘅巨峰提子香，呢種蛋糕嘅味道比較少有，甚有驚喜。餐飲份量都大大杯，配合呢個環境就啱哂。凍檸茶茶味夠濃，糖水係分開上。熱咖啡好香咖啡味，熱鮮奶打成奶泡，令咖啡更加香滑。