打邊爐海鮮火鍋燒烤店 (已結業)

重遊舊居土瓜灣，見到四處都係地鐵的工程，將以前的寧靜和人情味帶走了，覺得可惜。今日約左個舊街坊兼朋友食飯，佢帶左我黎呢間位於銀漢街的打邊爐小店，從車來攘往的馬頭圍道走入內街，昔日的人情味又出返曬黎，突然之間有啲感慨。如果朋友唔介紹，都唔識得呢間小店，但見呢間舖都幾旺。土瓜灣大多數人識得去北帝街搵食，其實近紅磡一帶亦有啲隱世小店。這些小店，老闆多數親力親為，有會花時間了解客人的意見，有傾有講，又過一晚。朋友今日叫左個名貴野，今日食的係花甲蟹鍋。個鍋有大量花甲同肉蟹，好足料好好肉地，性價比好高。個湯亦有酒香及黑椒味，即係好惹味。份量以四個人黎講，係相當理想。跟手我地亦叫左個手切牛頸脊，牛味好濃同好彈牙。個湯底本身都好香，mix埋靚牛個湯更好飲。強烈建議個次序係要先食牛頸脊，之後個湯底會更醒神。臨尾叫左個沙鍋㷛仔飯包底，街坊野，真係好香，好過食一般打邊爐叫公仔麵。睇個menu其實有好多正野，如果下次再黎我會想試下個魚鍋，可惜我已經好飽。我一定會再黎的。