滿屋日本料理 (已結業)

我每逢諗唔到想食乜，就會衝去食放題，貪佢乜都有得食得來價錢又比自助餐平好多，今日就去咗銅鑼灣呢間滿屋食佢嘅放題。佢嘅點餐紙上面每一樣食物都係圖文並茂，非常清晰，保證唔會點錯嘢！自助飲品區有好大個雪櫃，有接近30款飲品俾食客選擇，有糖無糖、有氣無氣嘅飲品都有得揀。最正嘅係連日本清酒都有得任飲，真係好高質！仲有好多冷盤小食俾食客選擇，最正嘅係有翡翠螺同凍蝦。鍾意食放題嘅主要原因就係有無限量嘅刺身任食，呢間放題刺身款式選擇多，而且仲有大大粒帆立貝同埋大大隻牡丹蝦，食多幾隻都已經差不多翻本！壽司款式都選擇多，有啲配搭仲幾特別！特別推介佢嘅炸雞翼同埋燒菠蘿，我encore咗兩次。串燒同牛柳粒味道都唔錯。佢連鍋物都有好多款，我就揀咗「清酒煮花甲」同埋「牛肉壽喜燒」。以下呢三款係出面比較少機會食到，真心一試無妨！當然最正就係每人有一杯雪糕，我哋就揀咗哈根大師，蜜瓜味超正！