Brooklyn (已結業)

夜晚同friend gathering，佢2月中食過Brooklyn，都幾正，所以今晚再去，不過一睇menu，價錢提高咗幾廿蚊，都加得幾快。落單之後，我地快快趣去攻略自助沙律吧，有湯同麵包任飲任食，又有各種貴價沙律菜、黑松露薯條、胡椒雞粒任潷，淋埋d沙律汁，堆滿一大碟拎番埋位慢慢嘆。餐廳佈置得唔錯，不過暗咗d，但係幾有情調，可以一邊食，一邊談心。大約20分鐘之後，開始上主菜，我點咗雙層芝士安格斯牛肉漢堡，加炒白菌topping。個漢堡好厚，炒白菌嫩滑，芝士半融化，加埋兩塊頂級安格斯牛肉，賣相非常吸引。大啖咬落去，肉汁標哂出黎，食到舐舐脷。薯條灑咗甜椒粉，辣辣地，同沙律吧d薯條唔同口味。食完之後，再戰沙律吧，食到飽哂又滿足。