新泰國廚房

營業中

休息中

第一次寫食評，食咗呢一間嘢六七年啦，平時都有喺出邊留意泰國菜嘅餐廳，但係最後呢間都係我自己覺得最好食嘅泰國菜。海鮮冬陰功金邊粉，大碗料又足，有鮮蝦有青口，粉唔會煮得太耐吸到湯汁之餘唔會影響口感，食嘅時候依然食得出一條條吸住湯汁嘅粉；冬陰公湯酸辣得嚟唔會太嗆非常溫和，容易入口。今日食嘅燒牛肉，有一股焦香味之餘唔會柴口，配醬汁食可以冇咁易膩。蒜蓉包即叫即整，熱辣辣嘅蒜蓉包配搭牛油同埋蒜蓉嘅香味，唔知點講但係真係超正！另外一提燒牛肉同蒜蓉包趁熱嘅時候加埋一齊食係人間美味。牛肉嘅軟熟同油香配搭酥脆嘅蒜蓉包，牛肉嘅味道同蒜頭嘅香味融為一體，係一個會令人會心微笑嘅味道。*記住一定要趁熱食！酸辣蝦沙律嘅味道對於平時唔係食開辣嘅人來講可能太辣，但係如果配生菜食嘅話生菜會減輕佢嘅辣道，令成個沙律更加清爽開胃。