幸福鍋 (已結業)

好耐冇食過火鍋，經過見到主打台式一人一鍋既幸福鍋就想過過口癮。除咗火鍋之外，仲有台式飯盒，台灣面同小食。我地叫咗麻辣什錦牛肉鍋，士林鹽酥雞扒便當同古早花雕雞卷。麻辣什錦牛肉鍋湯底夠麻夠辣，有好多香料同新鮮辣椒。肥牛肉好多有水準，其他火鍋料有豬肉餃，鴨血，米血糕，豬大腸，枝竹，鳴門卷，仲有花甲，血糕同大腸整得好好唔會有腥臭味。蔬菜有韭菜，金菇同娃娃菜，最後落埋紅薯寛粉，吸哂湯底既精華好入味。士林鹽酥雞扒便當，雞扒新鮮炸好，有成隻手掌咁大，有椒鹽調味，香脆可口。滷肉飯係五花腩切細粒，送飯一流。仲有兩件台灣腸係入面。跟餐既紫菜湯都好足料，飲得出無落味精。古早花雕醉雞捲花雕味重好入味，肉質細嫩，唔會柴口。飲品叫咗一杯古早鮮橙茶，有好水果係杯裡面，清新既橙香仲有其他水果同茶味，去油解膩。